गोरखा । पूर्वगृहमन्त्री सुधन गुरुङले आफू फेरि पनि गृहमन्त्री बन्न सक्ने बताएका छन् । राष्ट्रिय स्वतन्त्र पार्टी (रास्वपा) गोरखाको पहिलो जिल्ला अधिवेशनको उद्घाटन सत्रलाई सम्बोधन गर्दै सांसद गुरुङले आफू फेरि पनि गृहमन्त्री बन्ने संकेत गरेका हुन् । 

प्रहरीको हिरासतमा रहेका विचौलिया दीपक भट्टसँग सझोदारी गरेको र सम्पत्ति विवरण भर्दा छलछाम गरेको आरोप लागेपछि उनले बैशाख ९ गते गृहमन्त्री पदबाट राजिनामा दिएका थिए । 

उनको राजीनामापछि प्रधानमन्त्री बालेन्द्र शाह ‘बालेन’ले अहिलेसम्म कसैलाई पनि गृहमन्त्री बनाएका छैनन् । यद्यपी सरकारले उनीमाथि छानविन गर्न भन्दै समिति भने गठन गरेको थियो । उक्त समितिले प्रधानमन्त्री कार्यालयमा आफ्नो प्रतिवेदन पेश गरिसकेको छ । 

कार्यक्रममा बोल्दै सांसद गुरुङले आफ्नो सम्पत्तिको विषयमा उठेका प्रश्नहरूको छानबिनका लागि सहजीकरण गर्न आफूले मन्त्री पदबाट राजीनामा दिएको बताएका । 

आफू गृहमन्त्री हुँदा आम जनताबाट अभूतपूर्व साथ र सहयोग पाएको बताउँदै उनले भने–‘मैले सार्वजनिक पदमा बसेर काम गरेपछि उठेका प्रश्नहरूको सामना गर्नुपर्छ भनेरै छानबिन समितिसमक्ष बयान दिएको हुँ । बयानका क्रममा कतिपय प्रश्नहरू निकै कडा थिए, जसको मैले सोहीअनुसार सहज र स्पष्ट जवाफ दिएको छु ।’

बयानका क्रममा आफूलाई समितिका पदाधिकारीले सम्पत्तिको स्रोतबारे प्रश्न गरेको समेत उनले बताए । गुरुङले भने–‘समितिले मलाई यतिका सम्पत्ति कहाँबाट ल्याउनुभयो ? भनेर प्रश्न गर्‍यो । मैले पनि सहज रूपमा छानबिन समितिलाई नै तपाईंको पनि सम्पत्ति छानबिन गरौँ न त भनेर प्रतिप्रश्न गरिदिएँ ।’

पूर्ण रूपमा सफाइ पाउनेमा आफू आशावादी रहेको बताएका गुरुङले फेरि पनि गृहमन्त्री बन्न सक्ने संकेत गरेका हुन् । 

उनले भने–‘मैले क्लीन चीट पाएर सरकारले मलाई पुनः गृहमन्त्री बनायो भने, मन्त्रालयमा आएर बधाई दिने र तस्बिर खिच्ने कामको लागि सुरूका दुई महिना कोही पनि नआइदिनुहोला ।’

सम्बोधनका क्रममा उनले अब बन्ने जिल्ला सभापति राजधानी केन्द्रित हुन नहुने बताए । 

उनले भने–‘अब बन्ने सभापतिले जिल्लामै बसेर पार्टीका गतिविधिहरू अगाडि बढाउनुपर्छ । राजधानीमा बसेर जिल्लाको सभापति बन्ने हो भने चुनावका बेला मात्र जनतामाझ पुगिन्छ, जसले पार्टीलाई फाइदा गर्दैन ।’

गुरुङ गोरखा क्षेत्र नम्बर १ मा २९ हजार ८९६ मत सहित विजयी भएका थिए ।