काठमाडौं । सरकारले काठमाडौं तराई द्रुतमार्ग ((फास्ट ट्रय्राक) का लागि अधिग्रहण गरेको क्षेत्रमा खोकनाबासीले रोपाई गरेका छन् । असार १५ अर्थात् राष्ट्रिय धान दिवसको अवसर पारी ललितपुरको खोकनावासीले रोपाईं सुरु गरेका हुन् ।

खोकनाका स्थानीय वासिन्दाले आज पत्रकार सम्मेलन नै गरी काठमाडौं–निजगढ द्रूतमार्गको प्रस्तावित जिरोकिलोबाट रोपाईं सुरु गरेका हुन् ।

काठमाडौं तराई द्रुतमार्गका लागि अधिग्रहण गरेको उक्त क्षेत्रमा स्थानीयबासी र प्रहरीबीच पटक–पटक झडप हुँदै आएको छ । अघिल्लो वर्षको रोपाइमा भएको झडपमा त केही किसान र प्रहरी घाइते नै भएका थिए ।

तर, यसपाली भने उनीहरुले पत्रकार सम्मेलनकै आयोजना गरी प्रस्तावित फस्ट ट्रय्राकको जिरोकिलोमा रोपाईं गरेका हुन् । खोकनाका स्थानीयबासीले सयौं वर्षदेखि आफ्ना पुर्खाले भोगचलन गर्दै आएको र आफ्नो संस्कृति जोडिएको क्षेत्र भएकोले सो क्षेत्रमा फास्ट ट्रय्राक बनाउन नदिने बताउँदै आएका छन् । ।

द्रुतमार्ग, बाहिरी चक्रपथ, १३२ केभी प्रसारण लाइन आदिले संस्कृतिमाथि प्रहार गरेको र आफूहरूलाई उठीबास बनाएको भन्दै स्थानीयले विरोध गर्दै आएका छन् । यो विषय सर्वोच्च अदालतमा विचाराधीन छ ।