काठमाडौं । नेपाल कम्युनिष्ट पार्टी (नेकपा) एमालेका वरिष्ठ नेता माधवकुमार नेपालले पार्टी अध्यक्ष केपी शर्मा ओलीले जति नै धेरै गाली गरे पनि आफू पार्टी एकता होस् भन्ने पक्षमा रहेको बताएका छन् ।

शुक्रबार सम्पन्न आफ्नो पक्षका केन्द्रीय सदस्यहरुको बैठकलाई सम्बोधन गर्दै नेता नेपालले पार्टी एकतामा जोड दिएका हुन् ।

‘केपी ओलीले मलाई जति नै गाली गरे पनि म अहिले पनि पार्टी एकता होस् भन्ने पक्षमा छु,’नेता नेपालले भने, ‘एकताका लागि मेरो प्रयत्न जारी छ ।’

त्यस्तै नेता नेपालले भने, ‘केपी ओलीले अल्मल्याउन खोजेको त होइन भन्ने धेरै साथीहरुले आशंका गर्नुभएको छ । तर त्यसो नहोला भन्ने ठान्छु र एकतामा जोड दिन चाहान्छु।’

बिहीबारदेखि राजधानीको बुद्दनगरमा सुरु भएको नेपाल पक्षको केन्द्रीय सदस्य बैठकले पार्टी एकताका लागि लचिलो बन्ने तथा नेतृत्व पक्षले आत्मालोचना गर्नु पर्ने निष्कर्ष निकालेको छ।