कैलाली । नेपालका चार धाम मध्यको एक अछामको वैद्यनाथ धाममा आउँदो फागुन १० गतेदेखि कोटिहोम लाग्दैछ । सो कोटिहोम एक सय ४४ बर्षपछि लाग्न लागेको हो । जसको तयारी यति बेला तीव्र छ ।

अहिले मुल आयोजक समितिले विभिन्न ३५ वटा समिति बनाएर काम अघि बढाएको छ । कोटिहोम मुल आयोजक समितिका प्रतिनिधिहरु यति बेला प्रचारप्रसारका लागि देश दौडाहामा छन् ।

साँफेबगर नगरपालिकाका निवर्तमान मेयर कुल बहादुर कुँवर, प्रदेश सभा सदस्य मेघराज खड्का र प्रतिनिधि सभा सदस्य शेर बहादुर कुँवर लगायतको टोली कोटिहोमको तयारीमा व्यस्त छ ।

सोही अवसरमा शनिबार कैलालीको धनगढीमा फागुन १० देखि २५ गते महाशिवरात्रिसम्म महायज्ञ आयोजना हुने मुल आयोजक समितिका संयोजक प्रतिनिधिसभा सदस्य शेरबहादुर कुँवरले कोटिहोमबारे जानकारी गराए ।

उनले फागुन १० देखि २५ गते महाशिवरात्रिसम्म लाग्ने महायज्ञको उद्घाटन राष्ट्रपति रामचन्द्र पौडेलले गर्ने बताए । उनका अनुसार महायज्ञमा झन्डै डेढ करोड खर्च हुने अनुमान छ । महायज्ञमा पाँच वटा मण्डप रहने महायज्ञ आयोजक समितिले जनाएको छ ।

साथै एक सय २५ व्राह्मणबाट हवन पूजा, सवा करोड दिप प्रज्ज्वलन गरिनेछ । संयोजक कुँवरले कोटीहोममा कथाबाचन प्रा. भवानीप्रसाद खतिवडाले गर्ने बताए ।

हालसम्म ८० लाख महायज्ञको लागि विभिन्न ठाँउबाट सहयोग जम्मा भएको आयोजकको भनाई छ । कोटिहोमबाट प्राप्त आम्दानीबाट बैद्यनाथ धाममा आयुर्वेदिक अस्पताल सञ्चालनमा ल्याउने तयारी छ ।