कास्की । सेती नदीमा माछा मार्ने क्रममा बेपत्ता एक जनाको शव सशस्त्र प्रहरीले निकालेको छ ।

कास्कीको पोखरा महानगरपालिका-१७ महतगौडास्थित सेतीमा खसेका ४० वर्षीय मंगा तामाङ्गको शव सशस्त्र प्रहरीको टोलीले गएराति निकालेको हो ।

सशस्त्र प्रहरी बल नेपाल नम्बर २४ कालिका गण कास्कीबाट गएको गोताखोर र विपद् उद्दार टीमसहितको फौजले उनको शव निकालेको सशस्त्रका सहप्रवक्ता डीएसपी शैलेन्द्र थापाले बताए ।

शव पोस्टमार्टमको लागि पश्चिमाञ्चल स्वास्थ्य विज्ञान प्रतिष्ठान पठाएको छ ।

माछा मार्ने क्रममा बेपत्ता अर्का एक जनाको खोजी भइरहेको उनले बताए । माछा मार्न गएका पाँचमध्ये अन्य ३ जना भने सकुशल रहेको उनले बताए ।