काठमाडौं । स्वास्थ्य तथा जनसंख्यामन्त्री डा. सुधा शर्माले पदमा बहाल भएपछि कर्मचारीहरुमा आतंक सृजना गरेकी छन् ।

महाशाखा, शाखा परिवर्तनदेखि लिएर स्वास्थ्य सेवा विभाग मातहतका निकायमा कर्मचारी सरुवातिरमात्रै ध्यान केन्द्रित गरेकी छन् ।

तीन दशकसम्म स्वास्थ्य सेवाकै कर्मचारी हुँदै सचिवसम्म पुगेकी उनले मन्त्री पदलाई इगो र प्रतिशोध साँध्ने अस्त्र बनाएकी छन् । पछिल्लो समय स्वास्थ्य सेवा विभागका महानिर्देशक डा. टंक बराकोटीले उनको हैकमवाद र अतिचार सहन नसकेर पदबाटै राजीनामा दिएर सेवाबाट बाहिरिएका छन् ।

उनी जागिर अवधि साढे २ बर्ष बाँकी हुँदै मन्त्री शर्माको ज्यादतिले सीमा नाघेपछि सेवाबाटै राजीनामा बाध्य भएका छन् । यसअघि महानिर्देशक रहेका डा. विकास देवकोटा स्वास्थ्य तथा जनसंख्या मन्त्रालयका सचिव बढुवा भएपछि डा. बराकोटीलाई बरिष्ठताका आधारमा उक्त जिम्मेवारी दिइएको थियो ।

डा. सुधा शर्माले मन्त्री हुनासाथ महानिर्देशक बराकाटीलाई अनावश्यक दबाब र टर्चर दिएपछि उनी राजीनामा दिने निष्कर्षमा पुगेको स्रोत बताउँछ । मन्त्रालयमा अहिले सुधाका विगतका बिचौलियाहरु नै हावी हुन पुगेको आरोप छ ।

स्रोतका अनुसार कोही जेनजीका नाममा र कोही बिचौलियाकै रुपमा सुधाको भित्रिया बन्दा मन्त्रालयभित्रका कर्मचारीहरु समेत आतंकित हुन पुगेका छन् । मूल कार्यदिशा छाडेर सरुवा र नियुक्तिमै रमाएकी मन्त्री सुधा आफू नेपाली कांग्रेसनिकट भए पनि पछिल्ला दिनमा जेनजीका रुपमा प्रस्तुत हुने गरेकी छन् ।

उनले आयुर्वेद विभागको महानिर्देशक रहेका डा. श्यामबाबु यादवको संरक्षण गर्न दिलोज्यान दिएर लागेकी छन् । दसौं तहका यादव आयुर्वेद चिकित्सक संघका अध्यक्षसमेत हुन् ।

उनी कांग्रेसनिकट भएकै कारण यसअघिका स्वास्थ्य मन्त्री प्रदीप पौडेलले आयुर्वेद विभागको महानिर्देशक बनाएका थिए । ११ औं तहको दरबन्दी रहेको ठाउँमा १० औं तहका यादव महानिर्देशक भएपछि स्टोर, प्रशासन र लेखासँग मिलेर हरेक खरिदमा कमिसनको धन्दा चलाउँदैआएका छन् ।

घरायसी सामानदेखि लिएर तौलियासमेत विभागकै प्रयोग गर्नसमेत लज्जा नमान्ने यादव अहिले डा. सुधाको भित्रीया बनेको आरोप छ ।

उनी डा. रामआधार यादवलाई पुरानै आयुर्वेद अनुसन्धान तथा तालिम केन्द्र बिकास समितिमा फर्काउन सुधालाई उकासिरहेका छन् ।

आफैंले बनाएको जेनजीको एक समूहलाई प्रयोग गरी डा. रामआधारलाई समितिको कार्यकारी निर्देशकमा फर्काउन उनी तल्लीन भएर लागेका छन् । डा. रामआधार केही महिनाअघि मात्र समितिबाट मन्त्रालयमा सरुवा भएका थिए ।

६ बर्ष समितिको नेतृत्वमा रहेका रामआधार फर्किएको ४ महिनामै पुनः त्यहीँ जान साम, दाम प्रयोग गरेर लागेका छन् । डा. श्यामबाबु दशौं तहको भएको हुँदा ११ तहका रामआधार आउनसक्ने भएकाले उनलाई समितिमा ब्यवस्थापन गरी आफू महानिर्देशकमा सुरक्षित हुन खोजिरहेका छन् ।

समितिको कार्यकारी निर्देशक पटक–पटक भएर करारमा कर्मचारी भर्ति गर्दासमेत आर्थिक लेनदेन गरेको आरोप लागेका उनै रामआधार फेरि फर्किएमा आश्चर्य नहुने भएको छ ।

११ औं तहको दरबन्दी रहेको आयुर्वेद विभागको महानिर्देशकमा दशौं तहका श्यामबाबुलाई कायम राखेर ११ औं तहका डा. बासुदेव उपाध्याय र डा. प्रदीप केसीलाई अन्यत्रै राख्नुलाई आश्चर्यका रुपमा हेरिएको छ । डा. रामआधारको दरबन्दी लुम्बिनी आयुर्वेद अस्पताल दाङ बिजौरीमा छ ।

प्रदेश मातहत रहेको उक्त अस्पतालमा उनी पदस्थापन भएका मितिदेखि हालसम्म हाजिर हुन गएका छैनन् । प्रदेशमा समायोजन भएका कर्मचारीलाई बिगतको दलको सरकारले कानुन बिपरीत बर्षौंदेखि संघीय सरकार मातहतको आकर्षक बिकास समितिको कार्यकारी निर्देशकको जिम्मेवारी दिएको थियो ।

जेनजी आन्दोलनपछिको सरकारले सुशासन कायम गर्ने भने पनि प्रदेशमा समायोजन भएका कर्मचारीलाई पुनः संघीय त्यो पनि आकर्षक कार्यालयमै जिम्मेवारी फर्काउने तयारीले सुशासनको धज्जी उडाएको छ ।