काठमाडौँ । नेपाली काँग्रेसका नेता चन्द्र भण्डारीले आफू विभाजनको पक्षमा नरहेको स्पष्ट पारेका छन् ।
पार्टी केन्द्रीय समितिको बैठकमा सहभागी हुन सानेपा पुगेका भण्डारीले सञ्चारकर्मीसँग कुराकानी गर्दै पार्टी आफू फुटाउने अभियानमा सामेल नहुने बताएका हुन् ।
भण्डारी आइतबार विशेष महाधिवेशनको उद्घाटन समारोहमा पुगेर सम्बोधन समेत गरेका थिए ।
सम्बोधनमा पार्टीलाई एकढिक्का राख्ने प्रयासस्वरूप आफू खटिएको बताउँदै गगन थापा र विश्वप्रकाश शर्मा कांग्रेसको भविष्य भएको जिकिर गरेका थिए ।
'गगन र विश्व पार्टीको भविष्य हो । पार्टी एक राख्न के–के समस्या छ भनेर म कुरा गर्न आएको हुँ । कांग्रेस एक भएर जान्छ त्यसमा मेरो समर्थन छ । विशेष महाधिवेशनमा सभापति देउवा पनि आउनुपर्छ । यो उहाँको पार्टी हो', भण्डारीले भनेका थिए ।