६४.६७ अंकले बढेको नेप्सेमा २१ अर्बको कारोबार

अनलाइन नेपाल

बिहिवार , चैत्र ५, २०८२

६४.६७ अंकले बढेको नेप्सेमा २१ अर्बको कारोबार

काठमाडौं। बिहीबार नेप्से ६४.६७ अंकले बढेर बन्द भएको छ। अघिल्लो कारोबार दिनको तुलनामा २.२९ प्रतिशतले बढेको नेप्से २८७७.०२ विन्दुमा रोकिएको हो।

नेप्सेमा आज ३४२ कम्पनीको एक लाख ९१ हजार २५१ पटकको कारोबारमा पाँच करोड ६९ लाख २० हजार ६०८ कित्ता सेयर किनबेच भए। जसअनुसार २१ अर्ब २२ करोड ३४ लाख ९४ हजार ८८६ रुपैयाँको कारोबार भयो। मंगलबार १२ अर्ब तीन करोड ४४ लाख ६ हजार ३२८ रुपैयाँको कारोबार भएको थियो। बुधबार भने सार्वजनिक बिदा (घोडेजात्रा)का कारण नेप्से बन्द रह्यो।

आज २४० कम्पनीको सेयर मूल्य बढ्यो। २२ कम्पनीको सेयर मूल्य मात्र ओरालो लाग्दा दुई कम्पनीका सेयर मूल्य स्थिर रहे। नेप्सेमा मंगलबार १३ समूहको कारोबार भएकामा सबै समूहका उपसूचक बढेर हरियाली छाएको छ।

जसअनुसार वाणिज्य बैंक समूहको सूचक ३.१६‚ विकास बैंक ३.९५‚ फाइनान्स १.९४ र होटेल तथा पर्यटन समूहका सूचक १.७५ प्रतिशतले बढे। यसैगरी जलविद्युत् २.२९‚ लगानी १.७७‚ जीवन बिमा २.७६‚ उत्पादन तथा प्रशोधन समूह १.८९ प्रतिशतले उकालो लाग्यो।

यस्तै लघुवित्त १.२४‚ म्युचुअल फन्ड ०.०४‚ निर्जीवन बिमा १.८०‚ अन्य १.९७ र व्यापार समूहको सूचक ०.१६ प्रतिशतले बढे।

कर्पोरेट डेभलपमेन्ट बैंक लिमिटेड‚ साल्पा विकास बैंक लिमिटेड र रिलायन्स स्पिनिङ मिल्स लिमिटेडका सेयरमूल्यमा सकारात्मक सर्किट लागेको छ। अर्थात् यी कर्पोरेट‚ साल्पा र रिलायन्सका लगानीकर्ताले १० प्रतिशतले आम्दानी गरे।

कारोबार रकमका आधारमा आज सबैभन्दा बढी ङादीपावर कम्पनी लिमिटेडको ६७ करोड १६ लाख १६ हजार ५३६ रुपैयाँको कारोबार भएको छ। ङादीको अन्तिम कारोबार मूल्य ४७४ रुपैयाँ कायम रह्यो। त्यस्तै कारोबार भएका सेयर संख्याका आधारमा सबैभन्दा बढी अपर तामाकोसी हाइड्रोपावर लिमिटेडको सेयर २५ लाख ४८ हजार २७१ कित्ता किनबेच भएको छ। यसको अन्तिम कारोबार मूल्य भने प्रतिकित्ता २३५ रुपैयाँ कायम रह्यो।

सम्बन्धित न्युज

प्रतिक्रिया दिनुहोस्

नयाँ अपडेट

थप नयाँ अपडेट

६४.६७ अंकले बढेको नेप्सेमा २१ अर्बको कारोबार