काठमाडौं । महाअभियोग सिफारिस समितिको बैठक आज पनि बस्दैछ । बैठक दिउँसो २ बजे बस्न लागेको हो ।

मंगलबारको बैठकमा प्रमुख प्रतिपक्ष दल नेकपा (एमाले) ले प्रधानन्यायाधीश चोलेन्द्र समशेर जबराविरुद्धको महाअभियोग प्रस्तावमाथि छलफल गर्न ढिलाइ गर्नुको कारण माग गरेको थियो ।

संघ र प्रदेश तहको निर्वाचनको मिति घोषणा भइसकेको र समितिलाई तीन महिनाका लागि समय दिएको उल्लेख गर्दै एमालेले यस्तो परिस्थितिमा छानबिनका लागि कठिनाइ हुनसक्ने बताउँदै आएको छ ।

बैठकमा एमाले सांसद विष्णु पौडेलले महाअभियोग प्रस्ताव दर्ता हुँदा सदन नचलेको भए १५ दिनभित्र सदन बोलाउनुपर्ने र सदन चलेको भए तीन दिनभित्र महाअभियोग प्रस्तावमा छलफल गर्नुपर्ने व्यवस्थाको उल्लंघन भएको भन्दै विरोध गरेका थिए ।