कैलाली । पछिल्लो समय कैलाली लागु औषध तस्करीको ट्रान्जिट बन्दै गएको छ । खुला सिमानाका कारण पछिल्लो समय कैलाली लागु औषध प्रयोगकर्ता तथा कारोबार गर्नेहरूको अखडा बन्दै गएको हो ।

जिल्लाका मुख्य सहरी क्षेत्रमा दिनहुँ जसो लागु औषध ओसारपसार तथा प्रयोगकर्ता नियन्त्रण हुने क्रम बढ्दै गएपछि लागु औषधको त्यस्तो अवस्था बाहिर आएको हो । सुदूरपश्चिम प्रदेश प्रहरी कार्यालयले लागु औषधविरुद्धको महाअभियान केही महिनादेखि कैलालीसहित यस प्रदेशका ९ वटै जिल्लामा सञ्चालन गरिरहेको छ । तर पनि लागु औषध प्रयोगकर्ता तथा कारोबार गर्नेहरूको संख्यामा भने कमी आउन सकेको छैन ।

यो अभियान कैलाली प्रहरीले पनि प्रभावकारी रुपमा कार्यान्वयन गरेको छ । लागु औषध सम्बन्धी सचेतना कार्यक्रम स्कुलदेखि गाउँ–गाउँसम्म सञ्चालन गर्दै आएको छ । तर पनि लागु औषध प्रयोगकर्ता तथा कारोबार गर्नेहरूको पक्राउ पर्ने संख्या भने घट्न सकेको छैन ।

यता कैलालीको अत्तरियामा रहेको ईलाका प्रहरी कार्यालय मालाखेतीले पनि लागु औषधविरुद्धको महाअभियान कार्यक्रम प्रभावकारी रुपमा लागू गर्दै सचेतना कार्यक्रमदेखि लागु औषध प्रयोगकर्ता तथा कारोबार गर्नेहरूलाई धमाधम पक्राउ गर्दै आएको छ । लागु औषधको दुरुपयोगको समस्या दिनानुदिन बढिरहेकाले जिल्लाको ईलाका प्रहरी कार्यालय मालाखेती आक्रामक शैलीमा लागु औषध कारोबारी पक्राउ गर्न थालेको छ ।

चालु आर्थिक वर्षको एक महिनामा मात्रै मालाखेती प्रहरीले लागु औषध प्रयोगकर्ता तथा ओसारपसारमा संलग्न २५ जनालाई पक्राउ गरेको छ । ईलाका प्रहरी कार्यालय मालाखेतीका प्रमुख तथा प्रहरी नायब उपरीक्षक गणेश बरालका अनुसार पक्राउ पर्नेमा २४ जना युवक र एक युवती रहेका छन् ।

उनीहरूलाई गोदावरी नगरपालिकाका विभिन्न स्थानबाट लागु औषधसहित पक्राउ गरिएको उनले बताए । उनीहरूको साथबाट २९ ग्राम ५२५ मिलिग्राम लागु औषध (खैरो हेरोइन) बरामद गरिएको डिएसपी बराल बताउँछन् । उनका अनुसार साउनमा लागु औषध सम्बन्धीका १५ वटा मुद्दा दर्ता भइसकेका छन् ।

लागु औषध नियन्त्रण गर्न एक्लो प्रयासले सम्भव नभएको उनी सुनाउँछन् । यो लागु औषधको जालो सहरदेखि गाउँ टोलसम्म फैलिसकेको डिएसपी बरालको भनाई छ । विशेष गरी अभिभावकले सन्तानहरूको रेखदेख नगर्नु, खुला सिमानाका, साथीहरूको देखासिकी, देशमा बेरोजगार बढ्नु नै युवायुवतीहरू लागु औषधमा फस्नुको कारण रहेको उनले औँल्याए ।

यस्तै गत आर्थिक वर्ष २०७९÷०८० मा ईलाका प्रहरी कार्यालय मालाखेतीले लागु औषधमा संलग्न ७८ जना पुरुष र ६ जना महिला गरी ८४ जना पक्राउ गरेको थियो । त्यसै गरी गत आर्थिक वर्षमा लागु औषधमा ५४ मुद्दा दर्ता भएकोमा ४५ वटा किनारा लागेका थिए भने ९ वटा चालु आर्थिक वर्षमा सारिएका थिए ।