काठमाडौं । नेपाल समाजवादी पार्टीका अध्यक्ष तथा पूर्वप्रधानमन्त्री डा. बाबुराम भट्टराईले वास्तविक र दिगो शान्ति, एकता, सद्भावनिम्ति सत्य र न्याय स्थापित गर्न सबैले ध्यान दिनुपर्ने बताएका छन् । पूर्वी शहर धरानमा भइरहेको विवादबारे टिप्पणी गर्दै उनले समाजिक सञ्जालमा यस्तो बताएका हुन् ।

उनले असत्य र अन्यायबीच उत्पीडित पक्ष जानेर वा नजानेर चूप बस्यो भने पनि सतहमा शान्ति, एकता,सद्भाव भएजस्तो देखिए पनि त्यो वास्तविक र दिगो नहुने बताए ।

नत्र सतहमुनिको ज्वालामुखीलाई नदेखैं झैं गरेर बस्दा वा मुढेबल र कुतर्कको स्याउलाले छोप्न खोज्दा भोलि झन् ठूलो अनिष्ट हुनसक्ने उनको भनाइ छ ।

‘हाम्रो विचारमा समाज र राज्यमा वास्तविक र दिगो शान्ति,एकता,सद्भावनिम्ति सत्य र न्यायको स्थापना र पक्षधरता अपरिहार्य हुन्छ ! असत्य र अन्यायको वीचमा उत्पीडित पक्ष जानेर वा नजानेर चूप बस्यो भने पनि सतहमा शान्ति,एकता,सद्भाव भएजस्तो देखिन्छ ! तर त्यो वास्तविक र दिगो हुँदैन,’ उनले भनेका छन्,’त्यसैले वास्तविक र दिगो शान्ति,एकता,सद्भावनिम्ति सत्य र न्याय वेलैमा स्थापित गर्न सबैले उत्तिकै ध्यान दिनुपर्छ कि ? नत्र सतहमुनिको ज्वालामुखीलाई नदेखैं झैं गरेर बस्दा वा मुढेबल र कुतर्कको स्याउलाले छोप्न खोज्दा भोलि झन् ठूलो अनिष्ट हुनसक्छ।’

समाज र देशमा शान्ति,एकता,सद्भाव कायम हुनैपर्छ! समाज र राज्यको उत्पत्ति भएदेखिको मानवजातिको यो साझा चाहना र खोजी हो। बुद्ध र अरस्तुदेखि मार्क्स र गान्धी हुॅदै हाम्रो पुस्तासम्म यो क्रम जारी छ।

विचार,दर्शन,धर्म,संस्कृति,राजनीतिका विभिन्न धार र हाॅगाविगा यसैको खोजीमा…

— Baburam Bhattarai (@brb1954) August 27, 2023