बुटवल । नेपाल कम्युनिष्ट पार्टी (नेकपा) एमालेका उपमहासचिव विष्णु पौडेलले एमाले विभाजित नभएको दाबी गरेका छन्।

बुधबार रुपन्देहीमा प्रेस चौतारीले आयोजना गरेको पत्रकार सम्मेलनमा बोल्दै नेता पौडेलले एमाले विभाजित नभएको र पार्टीले काँचुली फेरेको बताए ।

कार्यक्रममा पार्टी विभाजनलाई ‘पानीका फोका’सँग तुलना गरेका पौडेलले भने, ‘विभाजन भएको होइन, यो त पानीको फोकाजस्तै हो, धेरै दिन टिक्दैन, उनले अघि थपे, ‘यो त सर्पले काँचुली फेरेजस्तै हो।’

पौडेलले माधव नेपालको पार्टीलाई विचार र दर्शनका आधारमा नभइ लोभ र अवसरका लागि केही व्यक्तिले समूह बनाएको आरोप लगाए । ‘यो भद्दा अवसरवाद हो । उहाँहरू अवसरका लागि जनताको बहुदलीय जनवादसमेत त्यागेर जानुभएको छ’ उनले भने।