काठमाडौं । पर्साको पटेर्वासुगौली गाउँपालिका–४ स्थित फरहदवामा सामुदायिक जंगलबाट काठ तस्करी गरी ल्याउँदै गरेका व्यक्तिहरूलाई प्रहरीले रोकेर नियन्त्रणमा लिन खोज्दा तस्करसँग झडप भएको छ ।

प्रहरी र काठ तस्करबीच आज विहान ४ बजे अगाडि झडप भएको हो । प्रहरीले काठ तस्करी हुन लागेको सूचना पाएपछि जिल्ला प्रहरी कार्यालयबाट दुई जना सादा पोशाकका प्रहरी खटिएका थिए।

प्रहरीको संख्या कम देखेर ४ वटा मोटरसाइकलमा आएका ८ जना तस्करको समूहले प्रहरीमाथि ढुंगामुढा र लाठी प्रहार गरेपछि हवाई फायर गरिएको पर्सा प्रहरीले जनाएको छ ।

प्रहरीले ३ राउण्ड हवाई फायर गर्दा तस्कर फरार भएपनि उनीहरु चढेको दुइटा मोटरसाइकल भने नियन्त्रणमा लिएको जनाएको छ ।

प्रहरीले भारतीय नम्बर प्लेटको बिआर २२ एफ ४१०८ र ना ४० प ९३९६ नम्बरको मोटरसाकल नियन्त्रणमा लिएको हो। पर्सा प्रहरीले फरार तस्करको खोजी कार्य भइरहेको जनाएको छ ।