काठमाडौं । नेपाल उद्योग वाणिज्य महासङ्घका नवनिर्वाचित वरिष्ठ उपाध्यक्ष अञ्जन श्रेष्ठले निराशामा रहेका उद्योगी व्यवसायीहरूको मुहार हसाउने गरी काम गर्ने प्रतिबद्धता व्यक्त गरेका छन् ।

सर्वसम्मत चयन भएपछि सञ्चारकर्मीसँग प्रतिक्रिया दिँदै वरिष्ठ उपाध्यक्ष श्रेष्ठले यस्तो प्रतिबद्धता व्यक्त गरेका हुन् । उनले चुनावको समयमा देशभरका उद्योगी व्यवसायीहरूमाझ गरेका प्रतिबद्धताहरू पूरा गर्ने गरी काम गर्ने बताए ।

उनले पछिल्लो समय व्यवसायीहरूलाई बैंकको ब्याजदर र तरलता अभावको कारण परेको समस्या समाधान गर्ने बताए । श्रेष्ठले आन्तरिक र वैदेशिक लगानी ल्याउनका लागि निजी क्षेत्रले पहल गर्ने बताए ।

उनले देशभित्र नै लगानीमैत्री वातावरण बनाउन सरकारसँग सहकार्य गर्ने बताए । बिहीवार वरिष्ठ उपाध्यक्षका उम्मेदवार अञ्जन श्रेष्ठलाई अर्का उम्मेद्वार उमेशलाल श्रेष्ठले समर्थन गरेसँगै उनी सर्वसम्मत निर्वाचित भएका थिए ।