बर्दिया । बर्दियामा किशोरीलाई बलात्कार गरेको आरोपमा प्रहरीले दुई युवक पक्राउ गरेको छ ।

बजारतिर घुम्न जाऔं भनी १८ वर्षीया किशोरीलाई मोटरसाइकलमा राखेर जंगलमा पुर्‍याइ बलात्कार गरेको आरोपमा जिल्लाको ठाकुर बाबा नगरपालिका–६ तुलसीपुरका २४ वर्षीय विनोद परियार र २० वर्षीय नवराज परियार पक्राउ परेका हुन् ।

जिल्ला प्रहरी कार्यालय बर्दियाका अनुसार आइतबार बेलुकी सात बजेतिर बजारतिर घुम्न भनेर उनीहरुले स्थानीय किशोरीलाई ठाकुर बाबा– ७ स्थित मध्यवर्ती सामुदायिक वनमा पुर्‍याइ बलात्कार गरेका थिए । पीडितले घटनालगत्तै प्रहरीलाई सूचना दिएकी थिइन् ।

बलात्कारपछि फरार परियारद्वयलाई खोजी गर्ने क्रममा इलाका प्रहरी कार्यालय वगनाहा भूरिगाउँबाट प्रहरी निरीक्षक पवन पछाइँको कमाण्डमा खटिएको टोलीले सोमबार दिउँसो १ बजे गाउँमा हिँडिरहेको बेला पक्राउ गरेको हो ।

आरोपितले घटना स्वीकार गरिसकेको बताइएको छ । पक्राउ परेकाविरूद्ध प्रहरीले बलात्कार मुद्दामा थप अनुसन्धान थालेको छ ।