दार्चुला । हजुरआमाको हत्या गरेको आरोपमा प्रहरीले दुई जनालाई पक्राउ गरी सार्वजनिक गरेको छ।

दार्चुलाको मालिकार्जुन गाउँपालिका-७ टोपाली बस्ने ८३ वर्षीय भागरथी देवी चन्दको हत्या गरी फरार रहेका २१ वर्षीय दिपक चन्द र १८ वर्षीय आषिस बमलाई प्रहरीले सार्वजनिक गरेको हो।

उनीहरूलाई कञ्चनपुर जिल्लाको भिमदत्त नगरपालिका-४ बसपार्क नजिकबाट भाद्र १२ गते पक्राउ गरी दार्चुला ल्याइएको तथा ज्यान सम्बन्धी कसूर अन्तर्गत मुद्दा दर्ता गरी अनुसन्धान भइरहेको प्रहरीले जनाएको छ।

आरोपी चन्द र बमले भदौ ८ गते राति चन्दलाई उनकै घरको कोठामा हसियाँ, कैची, चक्कु प्रयोग गरी छाती, पेट तथा घाँटी रेटी निर्ममता पूर्वक हत्या गरी शवलाई घर देखि ३ सय मिटर दक्षिणतर्फको भिरालो जमिनमा फाली गनेको सुकेको झारले ढाकेको अवस्थामा प्रहरीले फेला पारेको थियो।

चन्दको हत्या पछि प्रतिवादी बम र चन्द मृतकले कानमा लगाएका सुनका गहना एक जोर, बाकसमा राखेको अमेरिकी डलर १०० दरका ५ नोट, १ हजार दरको कोरियन रुपैयाँ र ४० हजार नेपाली रुपैयाँ लुटपाट गरी फरार भएका थिए।