काठमाडौं । पूर्वराजा ज्ञानेन्द्र शाहले राजतन्त्र फर्काउन एकजुट हुन आह्वान गरेका छन् ।

बुधबार नेपालगञ्जको रामलिला मैदानमा भएको नागरिक अभिनन्दन समारोहलाई सम्बोधन गर्दै शाहले अहिले पनि जनताको जिवनस्तर सुधार हुन नसकेको र मुलुक पनि अप्ठेरो अवस्थामा पुगेको भन्दै पुरानो गौरव फर्काउन आह्वान गरेका हुन् ।

उनले अब राष्ट्रको पुरानो गौरव फर्काउनका लागि उठौं भनेका छन् । उनले राष्ट्रको पुरानो गौरव फर्काउनका लागि के पुरुष, के महिला, के आजका जाँगरिला युवा, के अनुभवी बूढाबूढी सबैलाई जुट्न आह्वान गरे ।

पूर्वराजा शाहले उद्योगधन्दा, कलकारखाना, उत्पादन निष्प्रभावी रहेका कारण अहिले लाखौँ युवाहरू विदेशिन बाध्य भएको बताए ।