काठमाडौं । सेन्ट्रल एसियन भलिबल एसोसिएसन (काभा) पुरुष भलिबल नेसन्स लिगको पाँचौं खेलमा नेपालले आज शुक्रबार किर्गिस्तानको ‘बी’ टोलीसँग प्रतिस्पर्धा गर्दैछ ।

बिस्केकस्थित स्पोर्ट्स एण्ड रिक्रिएसन कम्प्लेक्समा नेपालले आयोजक टोलीको ‘बी’ टिमसँग खेल्नेछ । नेपाल र किर्गिस्तानबीचको खेल दिउँसो ३:४५ बजे सुरु हुनेछ ।

नेपाल यसअघि किर्गिस्तान ए सहित ४ टोलीसँग पराजित भइसकेको छ ।

पहिलो खेलमा मंगोलियासँग हारेको नेपाल दोस्रो खेलमा किर्गिस्तानको ए टोलीसँग पराजित भएको थियो । यस्तै तेस्रो खेलमा इरानसँग र चौथो खेलमा बिहीबार तुर्किमिनिस्तानसँग पराजित भएको थियो ।

नेपालसहित ७ टोलीको सहभागिता काभा नेसन्स लिगमा नेपालले अन्तिम खेल उज्वेकिस्तानसँग खेल्ने छ ।