काठमाडौं । किर्गिस्तानमा जारी सेन्ट्रल एसियन भलिबल एसोसिएसन (काभा) पुरुष भलिबल नेसन्स लिगको अन्तिम खेलमा पनि नेपालले हार बेहोरेको छ ।
आइतबार बिस्केकस्थित स्पोर्ट्स एण्ड रिक्रिएसन कम्प्लेक्समा भएको खेलमा नेपाल उज्वेकिस्तानसँग ३–० को सोझो सेटमा पराजित भएको हो ।
उज्वेकिस्तान नेपाललाई २५–२१, २५–२२ र २५–२३ को सोझो सेटमा पराजित गरेको हो । यो छैटौं हारसँगै जारी प्रतियोगितामा नेपालको कुनै खेल जित्न सकेन ।
नेपालले अघिल्ला पाँच खेलमा लगातार हार व्यहोरेको थियो । नेपालले पहिलो खेलमा मंगोलिया र दोस्रो खेलमा आयोजक किर्गिस्तानसँग हार व्यहोरेको थियो ।
तेस्रो खेलमा इरानसँग पराजित भएको नेपालले चौंथो खेलमा तुर्किमिनिस्तानसँग पराजित भएको थियो । यस्तै शुक्रबार किर्गिस्तानको ‘बी’ टोलीसँग पराजित हुँदै नेपालले पाँचौं हार व्यहोरेको थियो ।
सिंगल राउन्ड रोबिनमा हुने प्रतियोगिताको शीर्ष दुई टोली उपाधिका लागि खेल्ने छन् ।
Leave a Reply