काठमाडौं । हिमालयन रिइन्स्योरेन्स कम्पनीको आईपीओमा आजदेखि सर्वसाधारणका लागि बिक्री खुला भएको छ ।

कम्पनीले प्रतिसेयर १०० रुपैयाँमा १०६ रुपैयाँ प्रिमियम थपेर सर्वसाधारणका लागि प्राथमिक सेयर बिक्रीमा ल्याएको हो ।

१० अर्ब रुपैयाँ बराबरको जारी पुँजीको ३० प्रतिशत अर्थात् ३ अर्ब रुपैयाँ बराबरको आईपीओ सर्वसाधारणमा बिक्री गर्न लागेको छ।

जसमध्ये १० प्रतिशत अर्थात् ३० लाख कित्ता सेयर पहिलो चरणमा वैदेशिक रोजगारीमा रहेका नेपालीहरूका लागि बिक्री गरिसकेको छ भने बाँकी २ करोड ४९ लाख कित्ताका लागि कम्पनीले सर्वसाधारण लगानीकर्ताहरूसँग आवेदन माग गरेको हो ।

कूल जारी आईपीओ मध्ये २ प्रतिशत अर्थात् ६ लाख कित्ता कम्पनीका कर्मचारीका लागि छुट्याएको छ भने ५ प्रतिशत अर्थात् १५ लाख कित्ता सामूहिक लगानी कोषलाई छुट्याएर बाँकी रहेको २ करोड ४९ लाख कित्ता सेयर सर्वसाधारणमा जारी गरिएको हो ।

सर्वसाधारण लगानीकर्ताले न्यूनतम १० कित्तादेखि अधिकतम ३ लाख कित्तासम्मका लागि आवेदन दिन सक्नेछन् । आवेदन भने पुस १ गतेसम्म आवेदन दिन सकिने छ ।

तोकिएको सो अवधिमा सबै सेयर बिक्री नभएको खण्डमा भने पुस ११ गतेसम्म आवेदन दिन सकिने कम्पनीले जनाएको छ । कम्पनीको आईपीओ निष्कासन तथा व्यवस्थापनमा एनएमबी क्यापिटल रहेको छ ।