काठमाडौं । नेपाल प्रहरीमा प्रहरी वरिष्ठ उपरीक्षक (एसएसपी) को पदावधि ८ वर्ष बनाउने सहमति भएको छ । प्रस्तावित प्रहरी ऐनको मस्यौदामा एसएसपीको पदावधि बढाउन लागिएको हो ।
हाल एसएसपीको पदावधि ६ वर्ष छ । ३० वर्षे सेवाहद हटाउँदा ६ वर्षे पदावधिकै कारण धेरैले अवकाश पाउने भएपछि ८ वर्ष बनाउने सहमति भएको गृह मन्त्रालय स्रोत बताउँछ ।
प्रहरी समायोजनका लागि सरकारले नयाँ संघीय प्रहरी ऐन ल्याउन लागेको छ । जसमा ३० वर्षे सेवाहद हटाउने र उच्च पदको पदावधि हेरफेर गर्ने सहमति भएको छ ।
ऐनको मस्यौदामा आइजिपीको पदावधि ४ बाट ३, एआइजीको ५ बाट ४ वर्षबाट घटाउने सहमति भएको छ । एसएसपीको भने बढाउन लागिएको छ ।
यद्यपी ३० वर्षे सेवाहद हटाउने कि नहटाउने भन्ने विषयमा प्रहरीमा दुई किसिमको संघर्ष जारी छ । अवकाशको मुखमा पुगेका उच्च अधिकारी हटाउनुपर्ने पक्षमा छन् ।
भावी आइजिपीको लाइनमा रहेका अधिकारीहरु भने हटाउन नहुने पक्षमा छन् । यद्यपी समग्रमा भने सेवाहद हटाउँदा संगठनलाई फाइदा हुनेमा सबै सहमत छन् ।
सबै पक्षलाई मनाएर सेवाहद हटाउने पक्षमा गृहमन्त्री नारायणकाजी श्रेष्ठ लागेका छन् ।
Leave a Reply