कञ्चनपुर । कञ्चनपुरकी निर्मला पन्तको हत्या प्रकरणको अनुसन्धानका लागि आएको नेपाल प्रहरीको केन्द्रीय अनुसन्धान ब्युरो (सीआइबी) को टोली काठमाडौं फिर्ता भएको छ ।

सीआइबीका प्रहरी निरीक्षक धनदेव साउँद नेतृत्वको टोली अनुसन्धानका क्रममा प्रयोग गरिएका कम्प्युटर, फाइल तथा अन्य कागजपत्र लगायतका सबै सामान लगेर एक महिनाअघि नै काठमाडौं फिर्ता भएको हो ।

यद्यपि सो घटनाको अनुसन्धान भने जारी रहेको कञ्चनपुर प्रहरीले जनाएको छ । २०७५ साउन १० मा बलात्कारपछि हत्या गरिएकी भीमदत्त नगरपालिका–२ उल्टाखामकी १३ वर्षीया पन्तको हत्या घटनामा सीआइबीको टोलीले अनुसन्धान गरिरहेको थियो ।

तर सो टोली ५ वर्षपछि काठमाडौँ फिर्ता भएको हो । उल्टाखामकी १३ वर्षीया बालिका निर्मला पन्तको बलात्कारपछि हत्या गरेको पाँच वर्ष पुगिसकेको छ। तर हालसम्म पनि प्रहरी अपराधीसम्म पुग्नसकेको छैन ।

२०७५ साल साउन १० गते साथीको घरमा विद्यालयको गृहकार्य गर्न गएकी बालिका पन्तको शव साउन ११ गते नजिकैको उखुबारीमा भेटिएको थियो ।