कपिलबस्तु । कपिलवस्तुमा नहरको कुलोमा बीभत्स हत्या गरेर गाडिएको अवस्थामा भेटिएको शवको सनाखत भएको छ ।

जिल्लाको कपिलवस्तु नगरपालिका-४ पिपरी गाउँ नजिकैको नहरको कुलोमा शरीर जलाइएको र टाउको नभएको शव आइताबार साँझ फेला परेको थियो ।

जिल्ला प्रहरी कार्यालय कपिलवस्तुका अनुसार शव कपिलवस्तुको महाराजगन्ज नगरपालिका–६ भलवारीका २७ वर्षीय शिव कुमार कुर्मीको रहेको खुलेको छ ।

मृतक कुर्मी गत शनिबार साँझदेखि सम्पर्कविहीन भएका थिए । लुम्बिनी प्रादेशिक अस्पताल बुटवलमा राखिएको शवलाई मृतकका भाइले सनाखत गरेका हुन् ।

शरीरको केही भाग जलेको भएपनि कपडाले आफ्नै छोरा रहेको मृतकका बुवा रामपति कुर्मीले पनि पुष्टि गरे । शवलाई पोस्टमार्टमका लागि सोमवार बुटवल लगिएको थियो ।

शवको टाउको भने अझै फेला परेको छैन । शव गाडिएको स्थलदेखि अढाई सय मिटर उत्तरतर्फको खेतमा समेत रगत देखिएको प्रहरीले जनाएको छ । शवको सनाखत भएपछि प्रहरीले घटनाको अनुसन्धान सुक्ष्मरुपले अगाडि बढाएको छ ।