काठमाडौं । पछिल्लो २४ घण्टामा नेपालमा कोरोना संक्रमणका कारण ७ जनाको मृत्यु भएको छ ।

स्वास्थ्य तथा जनसंख्या मन्त्रालयको नियमित प्रेस ब्रिफिङमा मन्त्रालयका प्रवक्ता डा. जागेश्वर गौतमले कोरोना संक्रमणबाट पछिल्लो २४ घण्टामा एक महिला र ६ जना पुरुष गरी ७ जनाको ज्यान गएको जानकारी गराएका हुन् ।

डा. गौतमका अनुसार मृत्यु हुनेहरुमा काठमाडौंकी ७१ वर्षिया महिला र ७४ र ६६ वर्षका पुरुष, सिराहाका २२ वर्षका पुरुष, पर्साका ६८ वर्षका पुरुष, धनुषाका ७६ वर्षका पुरुष, र रुपन्देहीका ५३ वर्षका पुरुष रहेका छन् ।

योसँगै नेपालमा कोरोनाबाट मृत्युहुनेको संख्या १६४ पुगेको छ ।

नेपालमा आज (मंगलबार) थप ८५५ जनामा कोरोना भाइरस संक्रमण पुष्टि भएको छ । योसँगै नेपालमा कोरोना संक्रमितको संख्या ३३ हजार ५३३ पुगेको छ ।

स्वास्थ्य तथा जनसंख्या मन्त्रालयका अनुसार ११ हजार ३ सय २७ स्वाब परीक्षण गर्दा ८५५ जनामा कोरोना संक्रमण पुष्टि भएको हो ।

नेपालमा पछिल्लो २४ घण्टामा २७१ महिला र ५८४ पुरूष गरी थप ८५५ जनामा जनामा कोरोना भाइरसको संक्रमण पुष्टि भएको डा. गौतमले जानकारी दिए ।

उनका अनुसार पछिल्लो २४ घण्टामा थप ३१३ जना कोरोना संक्रमण मुक्त भएका छन् । योसँगै कोरोना संक्रमण मुक्त भई अस्पतालबाट डिस्चार्ज हुनेको संख्या १९ हजार ११९ पुगेको छ ।