काठमाडौं । प्रधानमन्त्री शेरबहादुर देउवा र नेकपा (माओवादी केन्द्र)का अध्यक्ष पुष्पकमल दाहाल ‘प्रचण्डबीच पूर्वप्रधानमन्त्री एवं नेकपा एमाले अध्यक्ष केपी शर्मा ओली नेतृत्वको सरकारले असंवैधानिक ढंगले गरेका सबै नियुक्तिहरू खारेज गर्ने सहमति भएको छ ।

मंगलबार बिहान प्रधानमन्त्री निवास बालुवाटारमा भएको छलफलमा उनीहरुबीच ओली सरकारद्वारा असंवैधानिक ढंगले गरिएका नियुक्ति खारेज गर्ने र साझा कार्यक्रम बनाएर सरकार सञ्चालन गर्नेबारेमा छलफल भएको स्रोतले जानकारी दिएको छ ।

यस्तै स्रोतका अनुसार प्रधानमन्त्री देउवा र अध्यक्ष प्रचण्डबीच सरकारमा दलको सहभागिता र मन्त्रालय बाँडफाँडलगायत विषय पनि छलफल भएको छ ।

यसअघि आज बिहान अध्यक्ष प्रचण्डले एमालेका वरिष्ठ नेता माधव कुमार नेपाल र जसपाका अध्यक्ष उपेन्द्र यादवसँग कोटेश्वरमा छलफल गरेका थिए ।

स्रोतका अनुसार उक्त छलफलमासमेत ओली नेतृत्वको सरकारले गरेका असंवैधानिक नियुक्तिहरू खारेज गर्नुपर्ने र मन्त्रालय बाँडफाँडका विषयमा छलफल भएको नेपालनिकट स्रोतले बताएको छ ।

पछिल्लो समय ओली नेतृत्वको सरकारले झण्डै ३ दर्जन नियुक्तिहरु असंवैधानिक ढंगले गरेको थियो । जसमा संबैधानिक परिषदसम्बन्धी अध्यादेश राजदूत नियुक्तका निर्णयहरु यसअघि नै खारेज भइसकेको छ।