काठमाडौं । ‘गुण्डा नाइके’ का रुपमा चिनिएका पर्शुराम बस्नेतले सम्पत्ति शुद्धीकरणको मुद्दामा सर्वोच्च अदालतबाट सफाइ पाएका छन्।

बिहीबार सर्वोच्च अदालतका न्यायाधीश दीपककुमार कार्की र टंकबहादुर मोक्तानको इजलासले नेकपा एमालेको युवा संगठन युवा संघका नेता समेत रहेका गुण्डा नाइके बस्नेतलाई सफाइ दिने फैसला सुनाएको हो ।

बस्नेतले सम्पत्ति शुद्धीकरण मुद्दामा विशेष अदालतबाट सफाइ पाएका थिए । २०७० जेठ ५ गते सम्पत्ति शुद्धीकरण अनुसन्धान विभागले बस्नेतसहित आपराधिक पृष्ठभूमिका ५ जनाविरुद्ध विशेष अदालतमा मुद्दा दायर गरेको गियो । विभागले गैरकानुनी कामबाट अबैध सम्पत्ति आर्जन गरेको भन्दै उनीहरुविरुद्ध मुद्दा चलाएको थियो ।

विशेष अदालतले बस्नेतको हकमा दावी नपुग्ने भन्दै सफाइ दिएपछि सम्पत्ति शुद्धीकरण विभागले सर्वोच्चमा पुनरावेदन गरेको थियो । प्रहरीको केन्द्रीय अनुसन्धान ब्यूरो (सीआईबी)र सम्पत्ति शुद्धीकरण विभागले २०७० साल जेठ ५ गते बस्नेतसहित पाँच जना गुण्डा नाइकेविरुद्ध विशेष अदालतमा मुद्दा दायर गरेको थियो।

सँगै मुद्दा चलाइएका गण्डकी प्रदेशका प्रदेश सभा सदस्य एवं खेलकुदमन्त्री दीपक मनाङेबाहेक गणेश लामा, पर्शुराम बस्नेत, अभिषेक गिरी र चक्रे मिलनको मुद्दा सर्वोच्च अदालतमा विचाराधीन छ।

बस्नेतले सम्पत्ति शुद्धीकरणको मुद्दामा सर्वोच्च अदालतबाट सफाइ पाएपछि सोही नजिरलाई टेकेर अब अन्य डनहरुले पनि सफाइ पाउने अवस्था देखिएको छ।