सुनसरी । प्रहरीले धरानस्थित न्यू कान्तिपुर होटल एण्ड गेष्ट हाउसमा मृत भेटिएकी महिलाको हत्या गरेको आरोपमा एक युवकलाई पक्राउ गरेको छ ।

पक्राउ पर्नेमा धनकुटाको पाख्रीबास नगरपालिका–६ फलाटे स्थायी घर भइ इटहरी नगरपालिका–५ तुलसा टोल बस्ने २४ वर्षीय विनेश रानामगर रहेका छन् ।

इलाका प्रहरी कार्यालय धरानका अनुसार आरोपित रानामगरले फागुन १६ गते राति ११ बजे ३९ वर्षीया सुमित्रा तामाङको हत्या गरेको अनुसन्धानमा खुलेको छ । घटनाको भोलिपल्ट अर्थात् फागुन १७ गते बिहान तामाङको शव कोठाभित्रै फेला परेको थियो । उक्त होटलमा मृतक तामाङसँगै दुई दिनदेखि बसेका रानामगर भने फरार भएका थिए ।

अर्को पनि पढ्नैपर्ने

धरानको होटलभित्र महिलाको शव भेटियो, सँगै बसेका पुरुष फरार

प्रहरीले मृतक महिलाको साथबाट ठेगाना खुलेको नागरिकता बरामद गरेपछि उनको शव पहिचान गर्न, आफन्त खोज्न र अनुसन्धान गर्न सहज भएको थियो। मृतक महिलाकोअनुहार र शरीरभरि निलडाम चोट देखिएपछि हत्या भएको आशंका गर्दै प्रहरीले हत्याराको खोजी तीव्र बनाएको थियो ।

उनले बयानका क्रममा आफूहरुबीच २ बर्षदेखि प्रेम सम्बन्ध रहेको स्वीकार समेत गरेको र आफूहरुबीचको विवादले उग्र रुप लिएपछि उनको घाँटी थिचेर हत्या गरेको समेत बताएको प्रहरीले जनाएको छ।