एजेन्सी । युरोपियन युनियन (ईयू) ले रुसविरुद्ध अहिलेसम्मकै सबैभन्दा कडा प्रतिबन्धहरू प्रस्ताव गरेको छ । ईयूले रुसी तेल आयात पूर्ण निषेध गर्ने र युद्ध अपराधका संदिग्धहरूलाई प्रतिबन्ध लगाउनेसहितका कडा कदम चाल्ने प्रस्ताव गरेको हो ।

युरोपियन कमिसनका अध्यक्ष उर्सुला भोन डेर लेयनले यस प्याकेजको उद्देश्य रुसमाथि अधिकतम दबाब दिने र युरोपमा हुने क्षतिलाई न्यूनीकरण गर्ने बताइन् ।

रुसी कच्चा तेल चरणबद्ध रूपमा छ महिनाभित्र रोकिने उनको भनाइ छ । बुचा र मारिउपोलमा संदिग्ध युद्ध अपराधमा संलग्न सैन्य अधिकारीहरूले पनि नयाँ प्रतिबन्धहरूको सामना गर्नेछन् ।

युरोपियन कमिसनका अध्यक्ष भोन डेर लेयनले बुधबार युरोपेली संसदमा सम्बोधन गर्दै यस कदमले क्रेमलिनको युद्धका सबै अपराधीहरूलाई महत्वपूर्ण संकेत दिने भन्दै उनीहरूलाई जवाफदेही बनाउने बताइन् ।

ईयूले रुसी तेल र ग्यासबाट आफूलाई कसरी छुटकारा दिने भन्नेमा हप्तौँदेखि ध्यान केन्द्रित गरिरहेको छ ।