पर्वत । पर्वतका तीनजना किशोरीमाथि बागलुङको एक होटलमा बलात्कार भएको छ । बागलुङमा जन्मदिन मनाउन भनि बोलाएर होटलमा लगि एक १६ वर्षीया र दुई १५/१५ वर्षीया नाबालिकामाथि जबरजस्ती करणी भएको हो ।

सोही आरोपमा प्रहरीले तीन युवकलाई पक्राउ गरेको छ । पक्राउ पर्नेमा बागलुङको गलकोट नगरपालिका–९ घरका २५ वर्षीय अशोक दर्लामी, रूपन्देहीको तिलोत्तमा नगरपालिका घर भएका १९ वर्षीय राहुल थापा र धादिङ कटुथे गाउँपालिका घर भएका १७ वर्षीया एक किशोर रहेका छन् ।

गण्डकी प्रदेश प्रहरी कार्यालय अनुसार घरबाट कसैलाई नभनी ती किशोरी २४ गते निस्किएका थिए । उनीहरूको खोजीका लागि भन्दै आफन्तले प्रहरीमा निवेदन दिएका थिए । जबर्जस्ती करणीपछि ती युवाहरू भागिसकेका थिए । फरार उनीहरूलाई बागलुङकै विभिन्न ठाउँबाट पक्राउ गरिएको प्रहरीले जनाएको छ ।

जिल्ला प्रहरी कार्यालय बागलुङले उनीहरुलाई आइतबार बागलुङकै विभिन्न ठाउँबाट पक्राउ गरी जबरजस्ती करणीको मुद्दा दर्ता गरी आजै जिल्ला अदालतबाट ७ दिनको म्याद थप गरेर अनुसन्धानका लागि अनुमति लिएको छ ।