काठमाडौं । लागूऔषध नियन्त्रण ब्युरो (एनसीबी)ले लागूऔषध कोकिनसहित २ जना विदेशी नागरिकलाई पक्राउ गरेको छ।

ब्युरोले ब्राजिल बाट दुबई हुँदै नेपाल आएकी ३२ वर्षीया युक्रेनी नागरिक डारिया एन्जोनिन्को र थाइल्याण्डबाट मलेसिया हुँदै नेपाल आएकी आरिया फोनोकलाई पक्राउ गरेको हो ।

पुस ६ मा ब्राजिलबाट दुबई हुँदै काठमाडौं आएकी युक्रेनी महिलाको साथबाट ब्यूरोको टोलीले ५ किलो ६ सय ग्राम कोकिन बरामद गरेको लागूऔषध नियन्त्रण ब्युरोका प्रमुख एसएसपी बिकास खनालले बताए ।

ठमेलस्थित होटलबाट पक्राउ परेकी डारियाको बयानको आधारमा सो कोकिन लिन आउने आरियालाई प्रहरीले पक्राउ गरेको हो । आरिया बैंककबाट काठमाडौं आएकी हुन् ।

ब्राजिलबाट काठमाडौं ल्याएको कोकिन कारोबारीहरुले बैंकक लान खोजेको अनुसन्धानबाट थाहा भएको एसएसपी खनालले जानकारी दिए । थाई नागरिक आरिया पुस ७ मा पक्राउ परेकी हुन् ।

आरोपीहरु विरुद्ध लागुऔषध नियन्त्रण ऐन–२०३३ विरुद्धको कसुरमा अदालतबाट म्याद लिएर ब्यूरोले अनुसन्धान गरिरहेको छ । एसएसपी खनालका अनुसार बरामद कोकिनको बजार मूल्य १२ करोड ९ लाख रहेको छ ।