बागमती । बाग्मती प्रदेशमा आज सानो आकारको मन्त्रिपरिषद् गठन गर्ने तयारी भएको छ ।

मुख्यमन्त्री शालिकराम जम्मकट्टेलसँगै दुई जना मन्त्रीले शपथ लिँदैछन् । सोमबार नेपालको संविधानको धारा १६८ को उपधारा (२) बमोजिम जम्मकट्टेल प्रदेशको मुख्यमन्त्री नियुक्त भएका हुन् ।

मंगलबार बिहान ९ः३० बजे बागमती प्रदेशको चौथो मुख्यमन्त्रीका रूपमा नियुक्त भएका जम्मकट्टेललाई प्रदेश प्रमुख यादवचन्द्र शर्माले पद तथा गोपनीयताको शपथ ग्रहण गराउने कार्यक्रम तय भएको छ । उनको शपथका लागि प्रदेश प्रमुख कार्यालय हेटौंडामा तयारी भइरहेको छ ।

माओवादी केन्द्र बागमती प्रदेश संसदीय दलको नेता जम्मकट्टेल सोमबार ५ दलको समर्थनमा मुख्यमन्त्री नियुक्त भएका थिए । उनलाई माओवादी केन्द्र २१ सांसद सहित, एमालेका २७, राप्रपाका १३, एकीकृत समाजवादीका ७ र हाम्रो नेपाली पार्टीका २ जना गरि ७० जना सांसदको समर्थन रहेको छ ।