कैलाली । कैलाली उद्योग वाणिज्य संघको आयोजनामा हरेक वर्ष हुने ‘सुदूरपश्चिम महोत्सव’को तयारी पूरा भएको छ ।

बिहीबार कैलाली उद्योग वाणिज्य सङ्घले आयोजना गरेको पत्रकार सम्मेलनमा संघका अध्यक्ष पुष्पराज कुँवरले महोत्सवको सबै तयारी पूरा भएको जानकारी गराएका हुन् ।

महोत्सवको उद्घाटन प्रधानमन्त्री पुष्पकमल दाहाल ‘प्रचण्ड’ ले गर्ने सङ्घका अध्यक्ष कुँवरले जानकारी दिए ।

सुदूरपश्चिमको उद्योग, पर्यटन तथा व्यापारको प्रवर्द्धन र आर्थिक विकास गर्ने उद्देश्यका साथ आयोजना हुने महोत्सव पुस २ गतेसम्म सञ्चालन हुनेछ ।

महोत्सवमा कृषि, व्यापार, अटोमोबाइल्स, लगायतको गरेर ४०० वटा स्टल रहेको सङ्घका अध्यक्ष कुँवरले बताए । महोत्सवमा करिब १० करोड रुपैयाँ बराबरको आर्थिक कारोबार हुने अपेक्षा गरेको आयोजकले जनाएको छ ।

महोत्सवको पाँच लाख दर्शकले अवलोकन गर्ने दाबी गरिएको छ । महोत्सव अवधिभरि सुरक्षा व्यवस्थाका लागि नेपाल प्रहरीसहित निजी सुरक्षाकर्मी परिचालन हुनेछन् ।