काठमाडौं । आईसीसी क्रिकेट विश्वकपको ग्लोबल छनोटअन्तर्गतको दोस्रो खेलमा अमेरिकाविरुद्ध नेपालले पहिला बलिङ गर्ने भएको छ ।

जिम्बावेको राजधानी हरारेमा रहेको टागासिंगा स्पोर्टस् क्लबमा टस जितेर नेपालले बलिङ रोजेको हो । नेपालले बलिङ रोजेपछि अमेरिकाले पहिले ब्याटिङ गर्दैछ ।

दोस्रो खेल खेल्दै गरेको नेपाल अमेरिकालाई हराएर प्रतियोगितामा पहिलो जित हात पार्न चाहन्छ । तीव्र गतिका बलर सोमपाल कामी औलाको चोटको कारण बाहिर रहेका छन् ।

सोमपालको स्थानमा देब्रे हाते स्पिनर ललित नारायण राजवंशीले मौका पाएका छन् । पहिलो खेलमा नेपाल घरेलु टोली जिम्बावेसँग पराजित भएको थियो ।

नेपाल जिम्बावेसँग ८ विकेटले पराजित भएको थियो । उता, अमेरिका भने वेस्ट इन्डिजसँग ३९ रनले पराजित भएको थियो ।